Saan latta a makumpirma ti Department of Justice (DOJ) nu kummiddaw ti political asylum ni sigud a Philippine Charity Sweepstakes Office General Manager Royina Garma idiay United States (US).
Segun kenni Justice Secretary Jesus Crispin Remulla, awan latta ti kumpirmasyon nu araramiden daitoy ti kampo ni Garma kasaruno ti panakakemmeg da kenkuana.
Uray ni Philippine Ambassador to the US Jose Manuel Romualdez ket saan a makumpirma nu nagkiddaw ti asylum ti sigud a police colonel.
Segun pay kenni Amb. Romualdez, agdamdamag ti embahada nu apay nga adda iti delay wenno pannakatantan ti deportation na.
Kinuna met ni Sec. Remulla nga immunan a nangidiaya ti DOJ ti witness protection kenni Garma gapo ta maibilbilang isuna kas ‘very important witness’.
Nadadagsen dagiti nagbalin a rebelasyon ni Garma iti Quad Committee hearing ti Kamara de Representantes, pakairaamananen iti reward system a mapapati nga naipatungpal iti kampaniya kontra iligal a droga idi panawen ni sigud a President Rodrigo Roa Duterte kasta met dagiti high-profile murder cases.
