LA UNION – Imbilin ti Department of Labor and Employment (DOLE) Regional Office-1 a temporaryo nga isardeng iti panangipatakder ti maysa a pasdek kalpasan a matay iti dua a construction worker a nagaburan ii daga idiay Baranagay Urbiztondo, ili ti San Juan, La Union.
Iti pannakiuman ti Bombo Radyo kenni DOLE Regional Office-1 Director Nathaniel Lacambra, kinunana a ti panangiruarna iti stoppage order para ti ECDI Construction ket tapno ipaayan dalan ti maisaysayangkat nga imbestigasyon.
Tarigagay a maammuan iti DOLE no adda iti nagkurangan ti kontraktor kangrunaaan iti proteksyon dagiti mangmangged.
Sigun kenni Lacambra, inton aldaw ti Lunes ket nakaduting nga agtaripnongda ti kontraktor idiay opisinana kas paset ti imbestigasyon.
Immuna iti daytoy, maipagarup a kabayatan nga agin-inana dagiti biktima iti maipatpatakder a pasdek idiay sakkaanan ti bantay ket killaat a nargaay ti daga.
Dua manipud iti tallo a constrution workers a nagaburan ket natay. (Absalom Flores)
