Dinagadag ni Department of Labor and Employment (DOLE) Undersecretary Benjo Benavidez kadagiti minimum wage earners nga ag-avail iti Ayuda sa Kapos Ang Kita Program (AKAP).
Segun kenni Benavidez, nakapasadya a naaramid ti programa tapno matulongan dagiti trabahador a makaaw-awat laeng ti minimum wage ken nababbaba pay ngem minimum wage.
Ti kontrobersial nga AKAP ket maysa a government assistance program babaen ti Department of Social Welfare and Development (DSWD) ken ti National Economic Development Authority.
Segun kenni Benavidez, mabalin a mangala dagiti mangmangged iti salary certification manipud kadagiti employer-da ken isubmitir daytoy iti DSWD.
Kinunana a ma-filter ti amin nga aplikasion basar kadagiti guidelines iti implementasyon daitoy.
Ditoy a makita no pasado da ken inton agangay ket agbalinda a benepisiario.
Segun iti opisyal ti DOLE, no agbalinda a benepisiario, maipakaammo met iti publiko dagiti rekord da ken makita daytoy ti Commission on Audit (COA), basar iti pagrebbenganda a mang-audit iti pondo ti publiko.
Maibasar iti 2025 General Appropriations Act (GAA) a pinirmaan ni Presidente Ferdinand Marcos Junior, addaan ti AKAP iti P26 billion a pondo para iti daytoy a tawen.
