LA UNION – Pinunas iti Department of Science and Technology (DOST) La Union Provincial Office iti panagdanag ti publiko maipapan panagparang ti “super blue blood moon” inton rabii.
Iti pannakiuman ti Bombo Radyo kenni Science Research Analyst Janine Campos, kinunana a no siyensia ti pagsasaritaan ket awan iti natibker a basaran wenno pammaneknek nga adda ti makasamak a kalamidad wenno karkarna nga insidente no agparang iti dakkel a bulan wenno ti “super blue blood moon”.
Naiparna laeng ti napasamak a didigra kadagiti dadduma a lugar iti napalpalabas a tawen kagiddan iti full moon.
Normal laeng sigun kenni Campos a maobserbaran nga adda iti high tide kadagiti babay, ngem saan a napeggad daytoy.
Kabayatanna, mangrugi ti nasao a celestial event agarup alas-6:49 inton rabii, ken ti kasayaatan nga oras a matmatan daytoy ket inton alas-7:48 ti rabii a panangrugi met iti partial eclipse.
Mangrugi met ti total lunar eclipse inton alas-8:51 ti rabii ken agpaot daytoy iti nasurok a maysa nga oras.
Aglippas met ti nasao nga astronomical phenomenon agarup alas-11:00 inton rabii.
Mapasamak manen daytoy inton tawen 2037.
