Naareston ti National Bureau of Investigation (NBI) iti maysa kadagiti karaman kadagiti maanomalia a flood control projects babaen ti warrant of arrest nga inpaulog ti Sandiganbayan.
Segun kenni NBI Officer-in-Charge ken Director Atty Angelito Magno, saan a naabutan dagiti personnel iti akusado a managan Anthony Ngo, maysa kadagiti board of directors ti Sunwest Corporation, iti balayna idiay Cavite, ngem nasurotan ken naarestar idiay Rolling Hills, New Manila, Quezon City.
Segun ti Quezon City Police District (QCPD), immunan a naidatag dagiti warrant of arrest iti pulisia babaen ti panangidaulo ti Criminal Investigation and Detection Group (DICG) unit ti Philippine National Police (PNP) ngem saan da a naabutan iti personalidad kadagiti napalabas a gandat dagiti otoridad.
Kabayatanna, malaksid kenni Ngo, sinarungkaran met ti QCPD ken ti Kamuning Police Station dagiti lokasion da Aliases Lerma Cayco ken Timojen Sacar iti South Triangle nga agpada nga accountant ti Department of Public Works and Highways (DPWH) Mimaropa Regional Office.
Impasigurado ti QCPD a papigsaen da iti sumaruno a follow-up operations ken manhunt efforts tapno matiliw dagiti adda ti listaan a napaulogan ti warrant of arrest.#
