BR LA UNION – Imbitaran ti National Bureau of Investigation dagiti nairaman ken ninaganan nga indibidwal iti sigud a security aide ni sigud a House Speaker Lord Alan Velasco a ni Rodulfo Gracioso Jr. iti insumite na a sworn statement wenno affidavit.
Segun kenni National Bureau of Investigation Director Atty. Melvin Matibag, iti panangayab da kadagiti indibiduwal ket paset ti isay-sayangkat nga imbestigasyon ken panangipaay ti gundaway nga agsarita dagiti mairam-raman a personalidad.
Iti nasao nga ‘sworn affidavit’ ni Gracioso, dinakamat na iti nagan da Vice President Sara Duterte, Davao City Rep. Paolo Duterte, sigud a Presidente Rodrigo Duterte, sigud nga House Speaker Velasco, Marikina 2nd District Rep. Miro Quimbo ken dadduma pay.
Segun kenni Gracioso, karaman ni Marikina Second District Representative Miro Quimbo a nag-deliver ti kuwarta iti sigud a House Speaker, a maipagarop a naggapo kada Curlee ken Sarah Discaya.
Ni Miro Quimbo, asawa ni sigud a Marikina 2nd Dist. Rep. Stella Quimbo, iti nagserbi nga ‘acting chairperson’ ti House Committee on Appropriations idi bimmaba iti pwesto ni sigud nga Ako Bicol Party-list Rep. Zaldy Co.
Ti sinapataan a salaysay ni Gracioso, maitudtudo ni Rep. Miro Quimbo a maysa kadagiti nagtaudan ti ‘cash delivery’ ken imbaga na a namin-adu a daras a napasamak ti panag-deliver ti kuwarta manipud kadagiti contractor.
Imbutaktak na pay, nga ad-adu manen ti naideliver a kuwarta kalpasan a nagbalin nga Speaker ti House of Representatives idi Oktubre 2020.
Innayon pay ni Gracioso, maipagarop nga imbaun isuna ti sigud a Boss Allan na tapno ag-pickup ti kuwarta manipud kenni Rep. Quimbo ngan iturong iti maysa a lugar tapno bilangen.
Malaksid pay daytoy iti dadduma nga mga insidente a panag-deliver iti maleta a kuwarta.
Ngem impaganetget ni Atty. Matibag a kasapolan pay a maberipika dagiti inbutaktak ni Gracioso sakbay a naan-anay a pattien dagitoy.
