Patien ni sigud a presidential legal counsel Attorney Salvador Panelo a napilit laeng ni dati a Philippine Charity Sweepstakes Office (PCSO) General Manager Royina Garma, kalpasan ti naan-anay a panangbaliktadna iti testimonia.
Segun kenni Panelo, nadarasudos ken saan a nasayaat ti pannakaaramid ti inbasa nga affidavit ni Garma bayat ti naudi a pannakadengngeg ti Quad Committee.
Indetalye iti beterano nga abogado dagiti maipagarup a biddut a nakailanad ti affidavit.
Umuna iti listaan ti statement ni Garma nga inawagan isuna ti dati a PRRD idi Mayo, 2016.
Segun kenni Panelo, mapagduaduaan daytoy agsipud ta mabalin a saan pay a nabutosan ni Duterte diyay a tiempo.
Maikadua iti daytoy ti kinuna ni Garma a saan nga paset isuna iti Davao Model a nausar iti national level iti drug war.
Pinagduaduaan ni Panelo no kasano nga ammo ni Garma dagiti detalye ti Davao model no saan met a paset isuna.
Impunto pay ni Panelo ti sumagmamano a daras a kinuna ni Garma dagiti balikas a ‘narinig’ ken ‘sinabihan’ kenkuana bayat ti panangisalaysayna iti pannakaammona iti drug war ti napalabas nga administrasion.
Kinunana a pammaneknek laeng a binuteng wenno napangtaan ti dati nga opisial ti Criminal Investigation and Detection Group sakbay ti testimonia na.
Ad-adda pay nga impaganetget ti dati a pannakangiwat ti presidente nga madama a nakabalud ni Garma ken mabalin a daytoy ti nangikompromiso kadagiti testimonia na.
Kinunana a mabalin nga gapo iti pressure isu a pinagbigyan na daitoy ken tapno saan a mapadaksan kadagiti mammanday-linteg a mangidadaulo iti hearing.
