BR LA UNION – Inwaragawag ni Manila Rep. Joel Chua a posible a nakaaramid ti election offense ni Vice President Sara Duterte nu mapaneknekan nga immawat ti pondo para iti kampaniya na idi 2022 manipud Chinese nationals nga adda pakainaiganna iti Pharmally.
Maiyannurot iti Omnibus Election Code, maiparit kadagiti gangannet nga agdonar iti kampanya, ken ilegal pay para kadagiti kandidato nga umawat ti nasao a kita ti donasyon.
Innayon ni Chua, mabalin nga agresulta daytoy iti culpable violation of the Constitution ken nalawag a panaglabsing iti election laws nu mapaneknekan a foreign nationals dagiti karaman.
Maibasar iti affidavit ni Ramil Madriaga, a nagpabigbig kas sigud nga aide ken bagman ni Duterte, immawat iti minilyon a pisos manipud kada Lin Weixiong ken kadagiti negosyante nga isuda Tony Yang ken Michael Yang para iti campaign activities.
Maipagarop a nausar ti pondo iti operations ti ISIP, maysa a non-profit a grupo, a maipagarop a nabuangay tapno suportaran iti kandidatura ni VP Sara.
Impaganetget pay ni Chua a sabali pay nga isyu nu ideklara dagiti nasao a donasyon iti Statement of Contributions and Expenditures (SOCE) ti Bise Presidente.
Kabayatanna, agtalinaed a silulukat iti House Committee on Justice iti biang ni Duterte tapno sungbatan dagiti alegasyon, laksid ti saan na a panagdar-ay kadagiti panagdengngeg ken nangidatag pay ti petisyon idiay Korte Suprema tapno ipasardeng iti proseso.
