LA UNION – Impaganetget ti Department of Works and Highways (DPWH) 1st Engineering District a nalapasen iti pannakaaramid ti kanal idiay Barangay Camansi, syudad ti San Fernando, La Union.
Daytoy kalpasan a nabullo ti maysa a misis kalpasan a natinnag daytoy ti kanal idi rabii ti Byernes, ken ti reklamo a saan pay a nailippas ti nasao a proyekto.
Iti pannakiuman ti Bombo Radyo La Union kenni Eng’r. Emil Ganaden ti DPWH 1st Engineering District, kinunana a nalapasen ti pannakaaramid iti kanal ken nairanta nga awanan daytoy iti kalleb malaksid kadagiti drive ways wenno batog dagiti babbalay.
Gapu ti napasamak nga aksidente, plano ita ni Ganaden a mangisayangkat ti imbestigasyon ken mangimuntar iti railings tapno saan a maulit ti kapada a pasamak.
Kabayatanna, agkidkiddaw met iti tulong ti biktima a ni Misis Lourdes Peralta para iti gastusen a panagpaagasna iti ospital.
Sigun kenni Peralta, naka-confine pay laeng daytoy iti ospital gapu ta saan a makapagna sipud natinnag isuna iti kanal.
Nangipanamnama met ni Engr. Ganaden a tulongan ti nasao a misis gapu ta maawatanna nga aksidente laeng ti napasamak.
