BR LA UNION – Umok dagiti sindikato a kriminal iti Department of Public Works and Highways (DPWH), segun kenni Senador Ping Lacson.
Segun iti senador, nakaawat kadagiti baro nga impormasyon a mangipak-pakita ti mala-mafia nga operasyon ti sumagmamano nga engineering offices ti ahensya iti naduma-duma a suli ti pagilian.
Inbutaktak ni Lacson a karaman ti sumagmamano nga opisyal ti DPWH iti naanomalyaan a flood control projects, kabilang dagiti saan a nairaman iti report a dimmanon kenni Presidente Ferdinand Marcos Jr.
Kinuna ti senador, adu ti “kalokoan” iti uneg ti ahensya, kas dagiti district engineer a mangman-maniobra iti proyekto ken uray iti Philippine Contractors Accreditation Board nga adda met laeng bukod da nga anomalya.
Impaganetget ni Lacson a dagiti mala-sindikato nga aktibidad ket saan laeng nga idiay Bulacan ngem uray pay iti dadduma a lugar kas idiay San Carlos City, Negros Occidental.
Immunan nga inbutaktak na iti privilege speech dagiti mapaspasamak a kinakusit iti flood control projects idiay Pampanga, La Union, ken Oriental Mindoro.
Innayon ti senador, a nakaawat ti report seknan dagiti kuwestiyonable a kontrata a naipaay kadagiti fly-by-night contractors kas ti Darcy and Anna Builders a nakagun-od ti flood control projects idiay Bulacan.
Nadagdagsen pay daytoy kuna ni Lacson, iti papel ti sumagmamano a mammanmday linteg a mangilunglungalong ti “insertions” iti badyet para kadagiti nasao a proyekto.
Gaputi kaawan ti transparency, saan a madetermina ken agtaltalinaed a natalged dagitoy manipud iti kinakusit ken panaglabsing iti linteg.
Impaganetget ni Lacson a kina-agum iti mangilung-lungalong ti korapsyon iti 2025 General Appropriations Act, ken dakdakkel ti alokasyon nga agtur-turong iti DPWH kumpara iti sektor ti edukasyon, banag a mailabsing iti linteg.
Innayonna pay nga uray ti subsidiya ti PhilHealth ket naapekaran gapu iti realignment nga inaramid tapno mapatgan ti proyekto ti sumagmamano a “funder.”
Impaganetget na, a daytoy ti rason nu apay nga agtultuloy ti panawaganna a transparency iti budget process tapno maamwan ken mapagsungbat dagiti mammanday linteg nga adda pakainaiganna iti anomalya ken ghost projects.
