LA UNION – Dead on the spot ti maysa a drug personality kalpasan a paltugan daytoy babaen iti riding in tandem suspects iti uneg ti Holy Garden idiay Barangay Dalumpinas Oeste, syudad ti San Fernando, La Union agarup alas-11:00 itattay bigat.
Nabigbig ti 45-anyos a biktima a ni Norlito Apilado, maysa met a tricycle driver, ken residente ti Purok 6, Barangay Sevilla ti nasao a syudad.
Iti pannakiuman ti Bombo Radyo kenni C/Ins. John Guiagui, hepe ti San Fernando City Police Office, kinunana a nangitulod laeng iti pasahero ti biktima iti uneg ti nasao a sementeryo idi a paltugan daytoy dagiti suspek.
Napartak met a naglibas dagiti suspek a naglugan iti maysa a motorsiklo.
Sigun kenni Guiagui, ni Apilado ket siguden a simmuko babaen ti Oplan Tukhang ti pulisya idi July 2016 ken mabigbig daytoy kas drug pusher iti lugarda.
Ngem base ti monitoringda iti biktima ket maipagarup nga agtultuloy daytoy a mangitantandudo iti droga kalpasan ti temporaryo nga insardeng ti pulisya iti pannakibiang ti war on drugs.
Impanamnama met ti opisyal iti pamilya ni Apilado a sapulenda ti responsable iti pammaltog.
Iti agdama ket agtultuloy pay laeng ti pulisya iti imbestigasyon iti nasao a krimen.
