LA UNION – Dukduktalen ita ti pulisya ti pudno a motibo iti pammaltog ti riding in tandem suspects a nakatayan ti drug personality ken nakasugatan iti kabsatna idiay Barangay Ubagan, ili ti Sto. Tomas, La Union.
Nabigbig ti natay a biktima a ni Alexander Padilla, 42-anyos; ken ti nasugatan a kabsatna a ni Jonathan Padilla, agpada a residente ti Barangay Namboongan ti nasao a ili.
Iti pannakiuman ti Bombo Radyo kenni C/Ins. Silverio Ordinado Jr., spokesperson ti La Union Police Provincial Office, kinunana a base iti imbestigasyon ti Sto. Tomas Police Station ket karuruar laengen manipud iti pallutan dagiti agkabsat idi a paltugan dagitoy iti suspek a nakalugan ti maysa a motorsiklo.
Dead on arrival idiay La Union Medical Center idiay ili Agoo, La Union ni Alexander gapu iti nakaro a sugat a nilak-am iti bagina; kabayatan nga agpapaimbag pay laeng ti kabsat daytoy kalpasan a mapungtaan iti bala ti ramayna gapu iti pammaltog dagiti suspek.
Sigun pay kenni Ordinado, siguden a simmuko babaen ti Oplan Tokhang ni Alexander ngem saan pay laeng a nagsardeng daytoy iti panagaramat ti iligal a droga kalpasan a nagpositibo isuna iti random drug test.
Kabayatanna, kitkitaen met ita ti pulisya no adda iti pakainaigan ti biktima iti dadduma pay nga iligal wenno ti personal nga aramid daytoy. (Absalom Flores)
