LA UNION – Dead-on-the spot iti maysa a 28-anyos a mekaniko ken drug personality iti napasamak a pammaltog iti kawatiwatan ti barangay road, sakop ti Barangay Dallangayan Este, San Fernando City, La Union.
Iti biktima ket nabigbig a ni Mark Bon Sumuingit, baro ken residente ti Barangay Sagayad ditoy met laeng syudad.
Maipagarup a posible a timpuar ti saan a panagkinna-awatan iti baetan ti biktima ken iti saan pay a nabigbig a suspek, iti maipagarop a napasamak a drug transaction.
Iti panagresponde dagiti otoridad, narekobre iti nakapasamakan ti krimen iti lima a basyo ti bala ti cal. 45 a paltog, maysa a unit ti cal. 45 pistol, maysa a plastic sachet a nagkarga iti dua a marijuana fruiting tops, ken maysa pay a plastic sachet ti maipagarop a shabu.
Iti biktima ket nagsagaba iti lima a tama ti paltog iti bagi a rason ti dagus a nakatayan daytoy.
Kabayatanna, agtaltalinaed iti custodiya ti SOCO dagiti narekobre a droga, paltog, ken bala para iti maisayangkat a naun-uneg pay nga imbestigasyon.
