LA UNION – Maysa manen a drug personality iti natay babaen ti pamaltog ti riding in tandem suspects idiay Barangay Consolasion, ili ti Agoo, La Union.
Nabigbig ti 42-anyos a biktima a ni Ullysis Cruz, mangmangged kas dispatcher ti pampasahero a van, ken residente ti Barangay San Augustin East ti nasao nga ili.
Iti pannakiuman ti Bombo Radyo kadagiti residente, kinunana a nangngegda nga immuna iti nagsasaruno a putok iti paltog kasaruno iti pannakakitada iti nakadasay a sidaradara a bagi ti biktima iti maysa a waiting shed.
Dagus met a naglibas dagiti suspek a naglubbon iti maysa a motorsiklo kalpasan a maipatungpal ti krimen.
Sigun met kenni C/Ins. Roy Villanueva, hepe ti Agoo Police Station, siguden a simmuko ni Cruz iti Oplan Tukhang ti pulisya idi napalabas a tawen ngem maipagarup a nagtultuloy daytoy iti illegal drug trade ti nasao nga ili.
Karaman kadagiti sirsiripen a motibo iti imbestigasyon ket no adda iti pakainaigan ti biktima iti iligal a droga.
Iti agdama, ket umabuten iti tallo a drug personalities ti nailista a pinapatay iti riding in tandem suspects kadagiti nagsina a lugar iti probinsya ti La Union ita laeng a bulan ti Enero 2018.
