Nagpanawagan ti Department of Social Welfare and Development (DSWD), partikular ti National Authority for Child Care (NACC), kadagiti social media platforms kas iti Meta nga ingetan iti panangipamaysa kadagiti online baby selling ken illegal adoption groups.
Segun kenni Rowena Macalintal, makikokoordinar ti ahensia iti Philippine National Police ken iti Women and Children Protection Center tapno ipamaysa dagiti Facebook groups a mangilaklako kadagiti ubbing wenno mangitantandudo iti online adoption.
Maipagarup a dumanon iti presio dagiti maladaga manipud ₱8,000 aginggana ₱130,000, ken adda pay dagiti sumagmamano a grupo nga addaan ti nasurok 13,000 a miembro.
Inlawlawag ni Macalintal a saan a mabalin nga maikkat amin a grupo gapu ta adda dagiti agtultuloy nga operasyon dagiti pannakabagi ti linteg ken entrapment activities.
Nupay kasta, mabalin nga agsungbat ti seller ken buyers iti sidong ti linteg, gapu ta illegal ti online adoption ditoy Pilipinas.
Impaganetget pay ti opisyal nga iti lehitimo a proseso ti adoption ket agpaut laeng ti nasurok-kumurang siam a bulan no masurot amin a dokumento ken pamay-an.
Mainaig iti daytoy, para kadagiti nagannak nga awan ti kabaelanna a mangaywan kadagiti annakda ket mabalin nga umasidegda iti NACC, DSWD offices, wenno dadduma pay a lisensiado a child care facilities para iti umno nga assessment ken counseling.
Nagpanawagan ni Macalintal a maaddaan ti pormal a dialogue iti gobierno ken ti Meta tapno iparit iti panagaramid dagiti grupo nga aglablabsing iti linteg.###
