LA UNION – Inpadamag ti Department of Social Welfare and Development (DSWD) nga umabot iti P1.37 billion ti dagup a cash assistance ti naited kadagiti naapektaran iti kallabes nga El Niño Phenomenon.
Dakkel a paset ti nasao a gatad ti naiwaras kadagiti naapektaran idiay Cagayan, ken sumagmamano a probinsia iti Visayas ken Mindanao.
Karaman pay ditoy iti 137,333 a benepisiario ti Ayuda sa Kapos ang Kita Program (AKAP) a nakaawat ti tunggal benepisiario iti 10,000 a cash.
Segun kenni DSWD Asst. Secretary for Disaster Response Management Group (DRMG) Irene Dumlao, ti panangipaay ti cash assistance kadagiti naapektaran iti El Nino ket paset ti plano ti Marcos Administration a mangsungbat iti epekto ti El Nino.
Kinunana a paset daytoy ti Presidential Assistance to Farmers, Fisherfolks, and their Families (PAFFF) no sadino a ti PBBM a mismo ti nangidadaulo iti panangiwaras kadagiti mannalon ken mangngalap.
Segun kenni Usec Dumlao, ibilang ti DSWD a krisis ti napalabas nga El Nino, isu ti gapuna nga agtultuloy ti panangipaayna iti tulong kadagiti biktima.
