Nangibunong iti pinansyal a tulong iti Department of Social Welfare and Development (DSWD) kadagiti residente nga apektado ti agtultuloy a panagalburoto ti Bulkan Kanlaon.
Maibasar iti datos ti DSWd Field Office VII, nakaawat ti financial aid iti nasurok 1,739 a pamilya nga agnanaed iti agdama idiay Camp 1 agingga 4 idiay Kanlaon City, Negros Oriental.
Tunggal pamilya ket immawat ti P3000 a pakabuklan a gatad ti tulong iti sidong ti Assistance to Individuals in Crisis Situations (AICS) Program ti DSWD.
Mabalin nga usaren dagiti residente ti nasao a tulong pinansyal manipud iti ahensya tapno masungbatan dagiti kangrunaan a kasapolan dagitoy bayat ti panagtalinaed iti evacuation centers.
Kabayatanna, siniguro ti DSWD nga agtul-tuloy iti panangipaay da ti tulong kadagiti vulnerable communities ken makaitulod iti kasapolan da iti tengnga ti didigra.
