BR LA UNION – Impasigurado ti Department of Social Welfare and Development (DSWD) nga ingetan da ti panangipatungpal ti regular a panag-monitor kadagiti private care facility iti intero a pagilian tapno masigurado ti kinatalged ken pagimbagan dagiti umili, partikular dagiti ubbing.
Amin a field offices (FOs) ket nabilin a mangisayangkat iti nauneg nga inspeksiyon ken spot monitoring, nangruna iti case management.
Agraman iti pannaki-uman ken focus group discussions kadagiti ubbing tapno maamwan dagiti aktual a padas ken kasasaadda iti uneg dagiti pasilidad.
Iti sidong ti setup ti ahensiya, ti DSWD central office ti responsable iti panagproseso ken panangipaay kadagiti certificates for registration, license to operate ken accreditation ti social welfare and development agencies babaen ti HELPS (Harmonized Electronic License and Permit System) online portal.
Nakatutok dagiti field office iti panangmonitor iti panagtungpal dagiti pasilidad iti naikeddeng a pagalLagadan kas iti pisikal a kinatalged, financial management, staffing, ken case management.
Daytoy nga addang ket kalpasan ti maysa nga insidente iti maysa a residential care facility idiay Pampanga, a nakaisalbaan iti 160 nga ubbing kalpasan iti report a makapad-padas dagitoy ti physical, verbal, ken psychological abuse, kaadda ti fire hazards, mismanagement of funds, ken saan a panangsurot iti regulatory standards ti DSWD.
Maipalagip nga inaresto ti Women and Children’s Protection Desk ti Pampanga Police ken DSWD Field Office-Central Luzon iti maysa nga Amerikano a pastor nga agserserbi a director ti New Life Baptist Church of Mexico, Pampanga, Inc., gaputi panaglabsing iti Republic Act 7610 wenno Special Protection of Children Against Abuse, Exploitation and Discrimination Act.
Mainaig ti daytoy, impaganetget ni DSWD Secretary Rex Gatchalian a saan a maiparbeng ti nasao nga aramid, isunga siniguro na nga agsungbat amin a karaman iti insidente.
Maki-koordinar da iti dadduma nga ahensiya kas iti Department of Justice ken Bureau of Immigration tapno mapapartak iti proseso ti pannakadusa ti suspek.
