BR LA UNION – Nasaripatpatan iti dua a barko ti China Coast Guard (CCG) 3301 ken 3104 iti mapatta-patta a 70 agingga 75 nautical miles manipud iti kabaybayan ti Luna, La Union idi Lunes, Pebrero 3.
Iti nasao a barko ti China ket immunan a naipadamag a nakita iti 34 nautical miles manipud iti kabaybayan idiay Bolinao, Pangasinan, a segun kenni Philippine Coast Guard (PCG) spokesperson for the West Philippine Sea Commodore Jay Tarriela ket kaasidegan a deployment dagiti barko ti China kadagiti coastline ti Pilipinas.
Babaen iti maysa nga interview, imbaga ti opisyal a naggapo ti dua a CCG vessels idiay Mindoro, nagturong idiay Pangasinan idi Lunes agingga a nakita iti kabaybayan ditoy La Union.
Innayon na pay nga agtultuloy iti panagdalyasat ti dua a barko ti CCG ken saan a kapada ti Monster ship nga adda laeng iti kabaybayan nga asideg ti Zambales.
Agtultuloy met iti panangsurot ti dua a barko ti Philippine Coast Guard a BRP Cabra ken BRP Bagacay tapnu i-challenge iti iligal a presensya ti dua a CCG vessels.
Mamati met iti PCG official a tarigagay ti China nga aramiden a normal iti ilegal a panangipatulod da kadagiti CCG vessels iti uneg ti exclusive economic zone ti pagilian.
Mainaig iti daitoy a pasamak, nangipeksa ti commitment iti Commandant ng Philippine Coast Guard a ni Admiral Ronnie Gil Gavan a lappedan iti panggep ti China nga aramiden a normal iti iligal nga aksion ti CCG ken agtalinaed a vigilante ken siguradoen a saan a kumaro nasao a tension. (By Bombo Roliza Padilla)
