BR LA UNION – Naituloy ita nga aldaw, Setyembre 23, ti maikatlo a panagdengngeg ti Independent Commission on Infrastructure (ICI) seknan dagiti anomalya iti flood control projects ditoy pagilian.
Sumagmamano a personalidad ti simmango tapno mangipaay ti palawag seknan dagiti isyu.
Kabilang ni sigud a Senate Committee on Finance Chairperson Grace Poe, a nagpalawag iti proseso ti budget idi isuna ti mangidadaulo ti komite.
Segun kenni Poe, normal laeng iti amendments ken suhestyon iti pondo, ngem agbalin a biddut nu iti mismo nga implementasyon ti proyekto ket adda iregularidad.
Karaman pay a napa-ayaban ni Navotas Rep. Toby Tiangco, a nangilanad ti ammo na seknan iti pondo a nailatang kadagiti substandard a proyekto.
Impaganetget na, a makit-kitan ti koneksyon dagiti immuna a waragawag na iti baro a rebelasyon ni Bulacan District Engineer Henry Alcantara, a nangibaga a karaman ni sigud nga House Appropriations Chairperson Zaldy Co iti maipagarop a 20%–25% a kickback manipud iti flood control projects iti lugar dagitoy.
Kabayatanna, dimmar-ay pay iti nasao a panagdenggeg da Sen. Jinggoy Estrada ken Sen. Joel Villanueva.
Maipalagip a nainaganan dagiti dua a senador iti House Infrastructure Committee, babaen kenni sigud a Bulacan Assistant District Engineer Brice Hernandez.
Segun kenni Hernandez, maipagarop nga immawat dagiti dua a senador ti agingga 30% manipud ti tunggal flood control project.
Segun iti ICI, agtultuloy iti serye ti panagdengngeg tapno masukimat a nalaing dagiti anomalya a pakairam-ramanan dagiti proyekto.
