BR LA UNION – Dua ti natay ken walo dagiti nadun-dunor kalpasan a nabaliktad ti nagluganan dagitoy a tourist bus idiay Germany.
Iti inisyal a report, napasamak ti insidente idiay A96 federal highway, asideg idiay Buchloe, Ostallgäu region agarop alas 6:00 ti agsapa (oras idiay Germany) idi Domingo, Setyembre 27, 2026.
Maipagarop a napukaw ti kontrol ti bus agingga a nabaliktad iti igid ti kalsada.
Segun iti DPA News Agency idiay Germany, ti nasao a bus ket addaan ti aganay 35 a pasaheros, agpapada a Filipino nationals, naggapo da iti biyahe manipud Zurich, Switzerland; nagturong da idiay Milan, Italy; agingga idiay Germany a nakapasamakan ti aksidente.
Segun kenni Martin Cornils, spokesperson iti traffic police, ti nasao a grupo dagiti turista ket dumar-ay da koma iti nalatak nga Oktoberfest beer festival idiay Munich, Germany.
Kabayatanna, saan met a naan-ano iti dua a bus driver.
