Patien dagiti dua a sigud a commissioners ti Bureau of Customs (BOC) a panawenen tapno maikkat dagiti Tara system iti nasao nga ahensia.
Daytoy ti inwaragawag da sigud nga Customs Commissioners Nicanor Faeldon ken Isidro Lapena kabayatan ti pannakaituloy ti Quad Committee hearing.
Segun kenni Manila Representative Bienvenido Abante, dakkel a panangparigat kadagiti umili ti Tara system.
Impagarigan ti kongresista ti panangpalubos kadagiti smuggled commodities, a mamagbalin a mangpangina kadagiti tagilako a kas iti bagas.
Iti naisina nga interpellation da House Deputy Minority Leader France Castro, inaklon da Faeldon ken Lapena nga iti laksid ti panangikagumaanda a mangdadael iti sistema ti tara, marigatanda met a makagun-od iti suporta manipud kadagiti importers.
Kinuna ni Faeldon nga insubmitir na ti listaan ti 12,000 nga importers ken brokers kadagiti customs officials nga umawat ti bill of lading, ngem agingga ita, kunana nga awan pay ti nakapasa.
Nasurok met nga 4,000 nga importer ken broker ti in-delist nan.
Ngem no la ket ta awan ti agtestigo nga importer wenno broker, narigat ti mangidarum kadagiti karaman iti sistema ti tara.
Insingasing ni Castro a mangisayangkat ti customs iti buy-bust operation tapno matiliw dagiti karaman iti kastoy nga aramid.
Inbinglay ni Lapena nga inaramidda dayta idin ngem iti maudi a kanito kellaat a nagsunod dagiti importers gapu ta kunada a mabalin a maapektaran ti negosioda.
