Kiniddaw ni Agri Party-List Representative Wilbert Lee iti Department of Transportation (DOTR) a luktan ti EDSA Busway kadagiti food delivery vehicle tunggal rabii manipud 10pm – 5am.
Babaen ti House Resolution No. 2162, inkalintegan ni Lee a makatulong daytoy tapno malapdan ti pannakatantan ti taraon ken dadduma pay a produkto ti agrikultura.
Segun kenni Lee, ti parikut iti trapiko iti Metro Manila ket masansan a pakaigapuan ti pannakaitantan ti deliveries ti taraon ken dadduma pay a produkto ti agrikultura nga agresulta iti pannakadadael wenno panagngato ti presio da.
Kas resultana, insingasing ni Lee iti DOTR a mangisayangkat iti konsultasion kadagiti agricultural ken food industry stakeholders tapno mangipaay kadagiti polisiya ken addang a mangpapartak iti pannakaipatulod ti makan iti National Capital Region.
