LA UNION – Natayen apaman a maisangpet idiay Ilocos Training and Regional Medical Center ti traysikel drayber gapu iti nilak-amna nga adu a sugat ti naduma-duma a paset iti bagina kalpasan a dungparen ti van iti manmanihuenna a lugan iti kawatiwatan ti national highway idiay Barangay Bitalag, ili ti Bacnotan, La Union pasado alas-2:00 itattay malem.
Nabigbig ti biktima a ni Jose dela Cruz, residente iti Barangay Catbangen, syudad ti San Fernando, La Union.
Iti pannakiuman ti Bombo Radyo iti respondent driver a ni John Wilmar Peralta, residente iti ili ti Balaoan, La Union, kinunana a killaat a nagsikko ti sarsarunnuenna a traysikel isu a nadalaposna daytoy kabayatan nga agturturongda nga agpa-syudad ti San Fernando.
Awan met iti nasugatan kadagiti uppat a pasaherona iti van, sigun kenni Peralta.
Kabayatanna, kinuna met ni Rochelle Romang, komare ti biktima, naimatanganda iti misterna ti nasao a pasamak idi a sarsarunnuenda dagiti dua a lugan.
Sigun kenni Romang, nakalugan daytoy iti sabali pay a traysikel a manmanehuen ti misterna idi a maimatanganna ti panangdungpar ti van iti traysikel ti kompadreda.
Napartak unay kinunana ti panagpataray ti van isuna nadalapusna ti sarsarunnuen a traysikel nga uray la a naipullasit.
Innayon pay ni Romang a paawidda koman idiay syudad ti San Fernando kaddua ti biktima a naggapu manipud idiay ili ti Bangar, La Union a naglako iti naduma-duma a kagawaan.
Iti agdama, manarimaan iti imbestigasyon dagiti kameng ti Bacnotan Police Station iti napasamak nga aksidente. (Absalom Flores)
