Impasiguro ni Development and Economic Planning Secretary Arsenio Balisacan nga agtaltalinaed a natibker ken napartak iti panagrang-ay iti ekonomiya ti Pilipinas laksid kadagiti sangalubongan a karit.
Manipud iti briefing ti Development Budget Coordination Committee (DBCC) idiay Kamara, imbatad ni Balisacan a kadagiti napalabas a 15 a tawen ket nakailista ti pagilian ti 6-7% GDP growth, malaksid laeng idi tawen 2020 gapo iti COVID-19 pandemic.
Para ti umuna a semestre ti 2025 ket nadanon ti Pilipinas ti 5.4% growth rate a maysa kadagiti kapartakan ti panagdur-as iti Asya.
Kinuna ni Balisacan a dimmanon ti 5.5% ti GDP growth idi 2023 ken 5.7% met idi 2024; bimmaba pay iti unemployment rate manipud 6% idi 2022 a nagbalin a 4.2% ita a 2025. Katupag daitoy ti nasurok 4.1M a napartaut a trabaho manipud idi tawen 2022.
Gapo iti daitoy ket naakit met iti atensyon dagiti foreign investors ken manipud Enero agingga Mayo agdama a tawen ket dimmanon ti net Foreign Direct Investment ti Pilipinas ti aganay US$3-B.
Bimmaba payen ti poverty incidence iti 15.5% idi 2023 manipud ti 18.1% idi 2021 wenno katupag ti 2.4-M a Pilipino a nakaruar iti kategorya kas marigrigat.
Segun kenni Balisacan, pammaneknek a ti panagrang-ay ti ekonomiya ket saan laeng a makitkita kadagiti numero nu di ket marikrikna mismo dagiti mangmangged ken pamilya a Pilipino.
