(Update) LA UNION – Addan iti nasayaat a kasasaad ti maysa a lalaki kalpasan a paltugan daytoy iti agim-imon a mister idiay Barangay Poblacion, ili ti Santol, La Union.
Iti pannakiuman ti Bombo Radyo kenni C/Inspector Danilo Ligayo, hepe ti Santol Police Station, kinunana a gapu iti maipagarup a nakaro a panagimon ti 48-anyos a suspek a ni Rolando Gagaoin iti makagapu tapno paltuganna ti 54-anyos a biktima a ni Felix Egipto nga agpada a residente ken agkaarruba pay iti nasao a lugar.
Base iti imbestigasyon sigun ti opisyal, maipagarup a kanayon nga iyang-angkas ti biktima ti asawa ti suspek isu a simmakit ti nakem daytoy.
Immuna iti daytoy, sakbay ti pammaltog ket maipagarup a nakilugan pay ti suspek iti motorsiklo ti biktima.
Idi a makaadayo dan ket pinaputukan ti mister ti biktima babaen ti cal .45 a paltog, ngem nakalibas daytoy.
Naiturong iti ospital ti biktima iti a mapungtaan ti bala ti sakana, kabayatan nga aglemlemmeng met ti suspek kalpasan ti pammaltog. (Absalom Flores)
