LA UNION – Kinumpirma ti pulisya a ti napapatay a pasahero nga adda iti uneg ti bus idiay ili ti San Juan, La Union ket isu ti kangrunaan a suspek iti panangpapatay ti maysa a lola idiay ili ti Sudipen, La Union.
Iti pannakiuman ti Bombo Radyo kenni S/Ins. Allan Alog, hepe ti Sudipen Police Station, kinunana a malaksid a maysa a drug personality a simmuko iti Oplan Tokhang ti napapatay a ni Michael Macusi a residente ti Barangay Poblacion, Sudipen ket natukoy daytoy kas suspek iti panangpapatay ti maysa a 63-anyos a lola idiay Barangay Turod idiay ilida.
Sigun pay kenni Alog, indatagan iti pamilya ti lola idiay korter iti kaso a murder ni Michael idi a sibibiag pay daytoy.
Maipagarup nga adda iti foul play ti pannakatay ti lola nga immunan a nasarakan ti bangkay daytoy a tumtumpaw iti maysa nga irigasyon idi Marso 18, 2018.
Kabayatanna, saan pay a nangted iti konkreto a konklusyon ti pulisya no ania iti motibo ti pammaltog ti riding in tandem suspects kenni Michael, ngem malawlawagan metten ti kaso.
Iti sabali a bangir, arigna a saan pay laeng a makapamati ken saan met a masegurado iti kakabagyan ni Michael iti makagapu ti pammaltog.
Sigun met iti ub-ubing a kabsat ni Michael a ni Julius, a kinuna kenkuana ti manungna idi a sibibiag pay daytoy nga awan iti panakainaiganna iti alegasyon maipapan ti pannakatay ti nasao a baket.
Innayon pay ni Julius, awan met iti nakarikyar ti kabsatna idiay lugarda.
Immuna iti daytoy, base ti imbestigasyon iti pulisya ket maipagarup a naggiddan a naglugan iti bus ni Michael ken ti gunman manipud idiay plaza iti ili ti Balaoan ken agturong idiay syudad ti San Fernando.
Idi a makagteng idiay paset ti Barangay Taboc ket nagpara ti suspek kasaruno iti panangpaltog iti ulo ni Michael.
Idi a nakarruar ti hitman manipud iti uneg ti lugan ket nakilubbon daytoy iti maysa nga agru-uray a naka-motorsiklo ken dagus a naglibas nga immadayo manipud iti crime scene. (Absalom Flores)
