LA UNION – Saanen nga interesado ti maysa a manager ti korporasyon a mangidatag iti kaso kontra kadagiti aglaklako iti padaw a nanglimlimo kenkuana idiay ili ti Bauang, La Union.
Naammuan iti Bombo Radyo manipud iti Bauang Police Station, pinakawan laengen iti 69-anyos a biktima a ni Leon Gaerlan dagiti uppat a nangilako kenkuana iti padaw gapu ta naasyan daytoy kadakuada.
Base iti imbestigasyon ti pulisya, gimmatang iti walo kilos a padaw nga agbalor iti P2,600 ni Gaerlan kadagiti suspek idiay igid ti national highway a masakupan iti Barangay Santiago ti nasao nga ili.
Ngem nagbalaw ti biktima idi a madlawanna a saan a maiyanatop iti bilang dagiti padaw ken ti timbang daytoy isu a nagreklamo isuna iti pulisya.
Idi nga inulitda a tinimbang dagiti nasao a produkto ket naduktalan nga agdagsen laeng daytoy iti dua a kilo.
Maipalagip, pinapanaw ken impariten iti San Juan Municipal Government nga agilako padaw iti igid ti national highway gapu iti kinaado ti maaw-awatda a reklamo.
Uray ti La Union Provincial Council ket nangaramid met idi ti addang ken panawagan kadagiti lokal nga opisyal ken pulisya nga ipawil iti panangilako iti padaw kadagiti igid ti national highway gapu met laeng iti kapada a reklamo a mabalin a makadadael iti imahe ti probinsya. (Absalom Flores)
