LA UNION – Dead on arrival idiay ospital ti maysa a tricycle driver kalpasan a paltugan iti saan pay a nabigbig a suspek idiay kawatiwatan ti Gov. Joaquin Ortega Ave. idiay Barangay Poro, syudad ti San Fernando, La Union agarup alas-8:05 idi rabii.
Nabigbig ti biktima a ni Darwin Juguilon, residente ti nasao a barangay.
Naammuan ti Bombo Radyo manipud iti San Fernando City Police Station, maipagarup a sinaed dagiti suspek ti biktima kabayatan nga agmanmaneho daytoy ti tricycle.
Ginandat pay ti tricycle driver iti naglibas kalpasan a mapuntaan daytoy iti bala ti paltog ngem saanen isuna a nakaadayo manipud ti nasao a lugar agingga a nagkapsot kasaruno iti panagarayat kenkuana dagiti residente sadiay.
Dagus a naglibas dagiti suspek a naglubbon iti maysa a motorsiklo kalpasan a maipatungpalda ti krimen.
Iti pannakiuman ti Bombo Radyo kadagiti agindeg ti nasao a lugar, awan met iti nangngegda a kanulbuong ti paltog idi a napasamak ti pammapatay.
Manipud iti kalsada ket naimatanganda a nagkamang ti biktima a nakalugan iti traysikelna iti uneg ti maysa a compound.
Agtultuloy met iti panangsapul ti pulisya kadagiti ebidensya ken testigo tapno maammuan iti motibo ti pammapatay para iti posible a pannakarisot ti nasao a kaso. (Absalom Flores)
