Pinasingkedan ni retired police colonel ken sigud a PCSO General Manager Royina Garma nga inadopt ti Duterte administration ti maaw-awag nga “Davao model” iti War on Drugs nu sadino dagiti opisyal a karaman iti pammapatay kadagiti drug suspects ket maik-ikkan ti reward.
Iti affidavit nga insubmitir ni Garma iti Quad Committee, indetalyena ti pannakaipatungpal ti “Davao model.”
Nagbalin nga emosional ni Garma idi inbasa na ti supplemental affidavit mainaig iti War in Drugs ti immun-una nga administrasion.
Iti affidavit ni Garma, impakaammona nga adda tallo a wagas ti panagbayad wenno dagiti maited a reward.
Kinunana, umuna iti tunggal suspek a mapapatay; maikadua para iti naiplano nga operasion, ken maikatlo ket refund ti operational expenses.
Inadmitir pay ni Garma a ni sigud a Presidente Rodrigo Duterte ti personal a nangawag kenkuana para iti pannakabukel ti national task force.
Kinunana, naam-ammona ni dati a Mayor Rodrigo Duterte gapu ta nagserbi daytoy a Station Commander iti maysa kadagiti police station idiay siudad ti Davao.
Segun kenni Garma, iti panagkitada ti sigud a Presidente, kiniddawna a mangbirok iti opisial ti PNP a kameng ti Iglesia Ni Cristo gapu ta kasapulanna ti maysa nga opisial nga addaan iti kabaelan a mangipatungpal iti War on Drugs para iti national scale ken maipada daitoy iti Davao Model.
Iti Committee hearing, sumagmamano a saksi ti dimteng manipud iti siudad ti Cebu a nagserbian ni Garma kas City Police Director.
Impalgak dagiti nakasaksi a mabuteng dagiti umili ken ni Garma.
Bayat ti panagtakemna kas city police director ti Cebu, immadu dagiti kaso ti extrajudicial killings.
