Inyestorya iti Bombo Radyo ti maysa kadagiti pasahero ti drug personality nga tricycle driver a pinalpaltogan iti uneg ti sementeryo ti Barangay Dalumpinas Oeste, San Fernando City, La Union no kasatnu a pinapapatay ti riding in tandem suspects ti biktima.
Iti eklusibo nga interview ti Bombo Radyo, kinuna ti saanen a nainaganan nga testigo iti krimen, naggapuda ti lola na iti sentro ti syudad a nakalugan iti traysikel nga minaneho ti biktima a ni Norlito Apilado ken agturong dagitoy iti chapel ti Holy Garden.
Apagbabada iti traysikel ken inyawat ti plete iti driver ket nakita na nga immasideg ti maysa a lalaki kasaruno ti nagsasaruno a pannakaipaputok ti paltogl.
Ginuyod na ti lola ken naglimmeng gapu iti buteng nga mairaman.
Idi a makapanawen dagiti suspek a nakalugan ti maysa a motorsiklo ket nakita na a nakadasayen ken dara-dara iti bagi ti traysikel driver.
Inladawan ti testigo a nakasando ti kolor gray, naka-helmet, napudaw ken natayag ti gunman ngem saan na unay a mabigbig ti motorcycle rider.
Kabayatan na, naamuan met dagiti kakabagyan ti biktima ti napasamak a pammaltog kalpasanda a mangngegdan ti damag iti Bombo Radyo uray saan pay a naipatangatan ti nagan daytoy.
Dagusda a nagturong iti sementeryo gaputa agmaymaysa laeng ni Apilado nga agmanmaneho ti traysikel nga addaan ti body number a 709.
Nagkedked met nga agkomento dagiti kakabagyan ti biktima maipapan iti maipagarop a pannakairaman daytoy iti listaan dagiti drug personality iti syudad.
Immuna ditoy, kinumpirma ni C/Insp. John Guiagui, hepe ti San Fernando City Police a ni Apilado ket siguden a simmuko iti Oplan Tukhang ti pulisya idi July 2016 ken am-ammo daytoy a drug pusher iti lugarda.
Ngem base iti monitoringda iti biktima maipagarop a nagtultuloy daytoy iti panangtaripato iti maipawil nga agas kalpsan a temporaryo nga insardeng ti pulisya ti pannakibiang iti war on drugs.
