BR LA UNION – Inladawan ti House Quad Committee idi Martes, Enero 21 a “gross miscarriage of justice” iti war on drugs campaign ti administrasyon Duterte agsipudta “fall guys” ken saan a pudno a mastermind iti smuggling ti iligal a droga ditoy pagilian, iti nadusa.
Iti opening speech na iti maika-14 a panagdengngeg ti komite, nakalidayan ni Surigao del Norte Rep. Robert Ace Barbers nga adda dagiti inosente a mabalud ti agingga 40 a tawen, idinto a dagiti pudno a nagbasol ket agtaltalinaed a siwaya-waya.
Karaman iti dinakamat ti mammanday linteg iti negosyante a ni Mark Taguba, iti bodegero a ni Fidel Anoche Dee ken sigud a Bureau of Customs employee Jimmy Guban, laksid ti kinakurang iti ebidensya.
Segun kenni Barbers, ni Dee a maysa a guwardiya ket immawat ti maipagarop a shipment iti maysa a “controlled delivery” ti Philippine Drug Enforcement Agency (PDEA).
Bayat a ti sigud a prosecutor a ni Aristotle Reyes ket na-apointaran pay nga RTC judge idinto a fall guys laeng dagiti nadusa iti kaso nga iniggaman na, segun kenni Barbers.
Nagpanawagan ni Barbers ti naun-uneg nga imbestigasyon iti maipagarop a kuwestyunable a prosekusyon dagiti nabalud.
Impaganetget ni Barbers a kasapolan a ma-amyendaran dagiti linteg, tapno maliklikan ti kaawan ti hustisya iti masangwanan.
Iti panagtultuloy ti imbestigasyon ti Quad Comm, imbaga ni Barbers nga ilungalong ti komite a madusa dagiti mastermind ti drug smuggling.
Nagpanawagan pay ti mammanday linteg iti Department of Justice ken dadduma pay nga ahensya ti gobyerno a siripen dagiti kaso tapno mapagsungbaty dagiti pudno a nagbasol.
