BR LA UNION – Naipasidong iti medical assessment idiay Quezon City Police District (QCPD) Medical and Dental Unit (MDU) ni Sherra De Juan, a sinukon dagiti kameng ti QCPD Police Station 5, kadwa ti pamilya na idiay Sison, Pangasinan idi kalman, Disyembre 29.
Maibasar iti report ti QCPD Station 5, nakasubli da idiay Manila agarop alas 1:10 itay parbangon, Disyembre 30.
Nakailanad iti initial medical evaluation ni Sherra, a nakapadas daytoy ti panagbakwar (nausea), a mabalin a gapwanan ti sumagmamano nga aldaw nga awan ti naipauneg na a taraon malaksid ti panaginom na ti danum.
Nupay kasta, awan ti nakita a senyales ti seryoso a sakit ken agtaltalinaed a nasayaat dagiti vital signs na idi naamiris daytoy.
Nadakamat a ti kondisyon na ket posible nga acid-peptic disease wenno dyspepsia, a masansan a gapu ti saan a regular a pannangan ken kellaat manen a pannangan.
Naipaayan metten ti umiso nga agas ken nabalakadan nu anya ti rumbeng nga ipauneg na a taraon ken kasapolan na ti inana.
Naipaayan pay ti nalawag nga instructions para iti follow-up ingkaso a saan a sumayaat ti panagrikna na.
