BR LA UNION – Pakabuklan nga Php 11,550,000.00 iti impaay a tulong pinansiyal ti gobyerno probinsiyal ti La Union nga idaulwan ni Gov. Mario Eduardo C. Ortega, para iti 462 a Public Elementary ken High Schools nga adda iti sidong ti Department of Education La Union Schools Division ken City Schools Division Office ti San Fernando.
Naisayangkat iti turn-over ceremony idiay Speaker Pro-Tempore Francisco I. Ortega Convention Center idi Martes, Agosto 12, 2025.
Ti nasao a kantidad ket nagtaud iti Special Education Fund iti Provincial School Board.
Tunggal pagadalan iti elementarya ken sekondarya ket immawat ti Php 25,000 bayat a dagiti integrated schools ket naipaayan ti Php 50,000 tunggal maysa.
Ti nasao a kantidad ket tulong ken suporta ti provincial government para iti programa a Brigada Eskwela ken panang-repair kadagiti pasilidad a dinadael ti naglabas a bagyo Emong.
Kadwa ni Gov. Mario ni Vice Governor Eric Sibuma ken dagiti Provincial Officials, impaganetget da ti espiritu ti ‘La Union Agkaysa’ para iti panangbukel ti natibker a pundasyon ti panagkakadwa tapno agtultuloy iti panangipaay ti suporta iti sektor ti edukasyon agturong iti de-kalidad nga edukasyon.
