Extended wenno pinaatiddog ti Court of Appeals ti freeze order a naipaulog kadagiti bank accounts, sanikua ken dadduma pay nga asset ni Kingdom of Jesus Christ leader Pastor Apollo Quiboloy.
Daytoy ket pinasingkedan ni KOJC legal counsel Attorney Dinah Tolentino-Fuentes iti press conference idiay siudad ti Davao idi kalman, Huebes, Agosto 29.
Kinunana, napaatiddog ti freeze order agingga iti Pebrero 3 inton sumaruno a tawen.
Agingga ita kunana a saan pay a naawat ti kampo da ti kopia ti extended freeze order.
Maipalagip nga idi Agosto 5, immuna a nangipaulog ti Court of Appeals ti 20-aldaw a freeze order kadagiti sanikua ni Quiboloy pakairamanan ti KOJC ken Swara Sug Media Corporation, a mangpatpataray ti Sonshine Media Network International (SMNI) a media arm ti KOJC.
Saklawen ti freeze order ti 10 a bank accounts, pito a real properties, lima a motor vehicles ken maysa nga aircraft a kukua ti KOJC, kasta met ti 47 a dadduma pay a bank accounts, 16 real properties ken 16 a motor vehicles ti KOJC
Ti nadakamat a freeze order ket kiniddaw ti Anti-Money Laundering Council nga inaprobaran met ti CA kalpasan a nakasarak da iti nainkalintegan a rason a dagiti bank accounts ni Quiboloy ket mainaig iti illegal nga aktibidad ken krimen kas iti human trafficking, sexual and child abuse, ken dadduma pay.
