BR LA UNION – Inaprubaran iti maikatlo ken maudi a panagbasa idiay House of Representatives iti gakat a mangpawayway ti agingga innem a tawen iti termino dagiti Barangay ken Sangguniang Kabataan Officials manipud iti agdama a tallo a tawen.
Iti naisayangkat a binnotosan, adda iti 153 a kongresista iti nang-aprubar iti House Bill 11287.
Adda met uppat a kongresista iti saan a pimmabor ken maysa ti nag-abstain.
Nakailanad pay iti nasao a gakat a ti synchronized Barangay ken SK elections ket maisayangkat tunggal innem a tawen iti maikadwa a Lunes ti Mayo mangrugi inton tawen 2029.
Awan met iti elective barangay officials nga agserbi ti nasurok dua nga agsaruno a termino iti kapada a posisyon.
Bayat nga awan met iti Sangguniang Kabataan official nga agserbi ti nasurok maysa a termino.
Iti nasao a gakat ket pinutar ni House Speaker Martin Romualdez ken sumagmamano a lider ti Kamara.
