Suportado ti maysa a gaming firm iti Bangko Sentral ng Pilipinas para iti addang daytoy a papigsaen wenno ingetan dagiti alagaden ti online gambling payments.
Malaksid iti daytoy, ibalballag da met iti posible a pangta dagiti sumagmamano a restrictions iti industriya.
Segun iti liderato ti DFNN Inc., epektibo met iti agdama a regulasyon iti online gaming. Nupay kasta ket suportadoda no adda ti maipatungpal nga additional measures.
Maibasar iti inruar a draft circular ti BSP, nakailanad dagiti baro nga alagaden a mangreqrequire kadagiti banko, e-wallets, ken dadduma pay a payment service providers a mangipatungpal ti enhanced safeguards sakbay nga agfacilitate dagiti online gambling payments.
Paset kadagiti napaingetan a regulasyon ket iti panangikabil ti daily spending caps, time limits, ken biometric verification, nga addaan panggep a masiguro a dagiti laeng nataengan wenno adults iti mabalin nga agusar iti serbisyo ken saan a dagiti menor de edad.
Pagdandanagan met dagiti sumagmamano a licensed online gaming operators iti plano a total ban iti online gambling ditoy pagilian, agsipudta saan daytoy nga agbalin a lapped kadagiti Pilipino nga agsugal, ken posible nga agturong da metlaeng iti black market tapno makaay-ayam. #
