LA UNION – Agtultuloy iti imbestigasyon ti pulisya maipapan ti inaramid a panangraut dagiti holdaper iti maysa a gasoline station idiay Barangay Cabaroan, ili ti Bacnotan, La Union idi rabii.
Iti pannakiuman ti Bombo Radyo kenni C/Ins. Reynaldo Soria, hepe ti Bacnotan Police Station, kinunana a siripenda ti video footage ti CCTV camera ti Flying V Gas Station para iti posible a pannakatukoy kadagiti suspek.
Sigun pay kenni Soria, iruarda met iti media ti kopya ti CCTV footge tapno makatulong iti panagkalapda ti impormasyon a mangtukoy kadagiti holpder.
Base Iti istorya dagiti empleyado ti gasolinahan nga isuda Mark Anthony Licudine ken Frederick Ibay, maipagarup a killaat a rimmaut dagiti dua a lallaki a nakaabbong ti rupada a nakalugan iti maymaysa a motorsiklo ken addaan iti ikot a saggaysa a paltog.
Dagus a naglibas dagiti suspek kalpasan a maalada ti P10,000 cash collection ti gas station ken ti dua a cellphone dagiti empleyado.
Naammuan nga awan iti gwardiya nga agbanbantay ti nasao a gasolinaan.
