LA UNION – Nakasaganan ti “Valentine’s Day treat to the community” ti Police Regional Office-1 (PRO-1) a maangay inton bigat, kagiddan iti panagrambak iti Aldaw dagiti Puso.
Iti pannakiuman ti Bombo Radyo kenni Supt. Ferdinand de Asis, spokesperson ti PRO-1, kinunana a mangrugi ti nasao nga aktibidad idiay grandstand ti kampo agarup alas-5:30 ti bigat.
Inawganda a “Zuwabi” dagiti maangay nga aktibidad ken mabalin a makipaset iti zumba dagiti tattao, karaman ti walking ken biking.
Iti walking, magna dagiti participants iti tallo a kilometro manipud idiay grandstand nga agturong idiay San Fernando City Plaza, kabayatan a ti biking ket dalyasaten met dagiti bikers iti 17 kilometro nga agturong idiay San Juan, La Union ken agrikos nga agsubli ti nasao a plaza.
Sigun kenni Supt. de Asis, ni Regional Director C/Supt. Rumulo Sapitula ti nakapanunot ti nasao nga aktibidad tapno ipalagip kadagiti umili ti kinapateg iti panangsalwad ti salun-at, ken kangruaan iti panangipamatmat dagiti umili a kontra iti droga, kriminalidad ken kurapsyon.
Al-allukuyen met ti PRO-1 ti amin nga umili a makipaset iti programa.
Amin a police provincial office iti Ilocos Region ket nabilin met nga aramiden ti nasao a programa inton bigat.
