BR LA UNION – Siniguro ni Presidente Ferdinand Marcos Jr. nga agtultuloy a denggen ti administrasyon na iti panawagan dagiti umili para kadagiti addang ti gobyerno tapno maibaba iti presyo dagiti gagatangen, nangruna dagiti kangrunaan a taraon.
Segun iti Presidente, nainget a maipat-patungpal ken bantayan ti gobyerno iti maximum suggested retail price (SRP) para iti imported rice, tapno maliklikan iti nangato unay a presyo ken maprotektaran ti pagimbagan dagiti aggat-gatang.
Innayon ti Chief Executive, agtultuloy ti panangikagumaan ti gobyerno a mapagtalinaed a kabaelan ti presyo ti bagas, kabilang iti agtultuloy a ₱20 kada kilo rice program a mangipapaay ti gin-awa iti pamilya a Pilipino.
Kagiddan daytoy, nainget ti panangbantay iti Department of Trade and Industry (DTI) iti presyo dagiti produkto ken makiko-koordinar da kadagiti manufacturer tapno malapdan ti panagngato ti presyo dagiti kangrunaan a gagatangen nangruna ita nga umadanin ti paskua.
