BR LA UNION – Immanamong dagiti lehislador a panawenen tapno agtignay ti gobierno kadagiti indibidual a mangiwarwaras iti peke a damag a mabalin a maibilang a traydor iti pagilian.
Iti hearing idi kalman ti Tri Committee a nairanta a sungbatan ti nasaknap a panagsaknap dagiti peke a damag iti social media ket inyebkas dagiti mammanaday linteg ti pakaseknan da maipapan iti weaponization iti digital platforms ken panagadu ti organized troll networks.
Gapu iti daytoy, nakita dagiti kongresista a panawenen tapno adda intervention ti gobierno a mangregulate iti pannakaiwaras dagiti palso nga impormasyon.
Iti TriCom ket buklen ti House Committees on Public Order and Safety, on Information and Communications Technology and on Public Information.
Inlawlawag ni Surigao del Norte Rep. Robert Ace Barbers a ti panggep ti imbestigasionda ket saan a tapno malapdan ti nawaya a panagsao ngem ketdi tapno maaddaan ti accountability iti digital space.
Nagpanawagan ni Barbers ti regulatory framework para iti social media a kapada dagiti ethical standards ti Kapisanan ng mga Brodkaster ng Pilipinas (KBP) para iti broadcast media.
Impakdaar ni Barbers a kaaduan kadagiti nadakamat nga aktibidad ket adda pakainaiganna kadagiti illicit financial sources manipud iti maiparit nga aktibidad kas iti operasion ti POGO wenno criminal syndicates.
Innayon ni Barbers a no mabaybay-an, ti peke nga impormasion ket mabalin a mangdadael iti panagtalek kadagiti institusion ti gobierno ken mangapektar iti demokrasiya ti pagilian.
Impaganetget met ni Laguna Rep Dan Fernandez nga adda dakes nga epekto ti panagsaknap ti palso nga impormasion, nangruna iti salun-at.
