LA UNION – Dead on arrival idiay ospital ti maysa a grade one pupil kalpasan a madungpar daytoy iti pampasahero a bus idiay kawatiwatan iti national highway ti Barangay Bangaoilan, ili ti Bangar, La Union itattay malem.
Nabigbig ti 6-anyos a biktima a ni Samantha Francisco nga estudyante ti Bangaoilan Elementary School.
Iti pannakiuman ti Bombo Radyo kenni C/Ins. Rogelio Miedes, hepe ti Bangar Police Station, kinunana a naggapu manipud iti eskwelaan ti biktima kaddua ti guardian daytoy.
Maipagarup nga immibbat iti isuna manipud ti kadduana a guardian ken killaat a bimmallasiw daytoy iti kalsada kasaruno iti pannakadungparna bus a manmanehuen ni Orlando Verzola ti Villasis, Pangasinan.
Saanen a naisalakan pay ti doktor iti biag ti biktima gapu ti nakaro sugat a sinagrap daytoy iti bagi.
Iti agdama, maisagsaganan ti kaso kontra ti nasao a bus driver nga adda ita iti salwad ti pulisya.
