LA UNION – Agtultuloy iti manhunt operations ti pulisya kadagiti dua a holdaper a naglibas kalpasan iti napasamak nga engkwentro iti batean dagitoy idiay Barangay Anunas, syudad ti Angeles, Pampanga.
Naammuan ti Bombo Radyo manipud iti Angeles City Police, a maysa kadagiti suksukimatenda ket ti van a mapapati nga inaramat dagiti holdaper tapno matukoy iti pakabigbigan ti nasao a grupo.
Immuna iti daytoy, napapatay dagiti dua manipud iti uppat a holdaper a nakalugan iti nasao a behikulo kalpasan a saanda a nagsardeng iti checkpoint kasaruno ti pannakilabanda kadagiti pulis.
Nabigbig ti maysa kadagiti napapatay ket nabigbig iti nagan a John Ray Atienza alias “Lincoln”.
Narekobre met iti pulisya ti paltog dagiti suspek ken dagiti basyo ti bala manipud ti nakapasamakan ti engkwentro.
Dagiti nasao a lallaki ket maipagarup a nang-holdap iti Sydney Hotel idiay Clarkview idiay Barangay Malabanias, Angeles City. (Absalom Flores)
