LA UNION – Inikkat ti Japan ti gymnast-da a ni Shoko Miyata iti listaan a makipaset iti Paris Olympics kalpasan a naduktalan nga agsigsigarilio ken umin-inum iti arak.
Dagus a napagawid ti 19-anyos a mangibagi kuma iti women’s gymnastics team ti Japan para iti Paris Olympics manipud iti training camp-da idiay Monaco.
Inadmitir na a sinalungasing na ti code of conduct da.
Segun ken ni Apan Gymnastics Association (JGA) secretary general Kenji Nishimura, dimmalan ti naan-anay a panagadal ken nakipagkitada kadagiti amin a partido sakbay nga inruarda ti desision a maikkat ni Miyata iti pannakipaset iti Olympics.
Innayon ni Nishimura nga adda nangipaka-ammo iti impormasionda a nakitada ni Miyata nga agsigsigarilio iti pribado a lugar idiay Tokyo idi Hunio ken umin-inum iti arak iti maysa a kuarto iti national training center idiay Japan.
