Pinaregta ti Department of Health (DOH) ti publiko nga agbalin nga impormado maipanggep ti Human immunodeficiency virus (HIV) iti kangitingitan ti panagngato ti 500% ti nasao a sakit ditoy Pilipinas.
Segun kenni Health Secretary Ted Herbosa, ti HIV test ket libre met ken confidential. Addaan da pay ti available a self-test kits kadagiti HIV care facilities ditoy pagilian.
Nagballaag pay ti DOH kadagiti sexually-active individuals nga ugalien ti safe sex babaen ti panangaramat kadagiti condoms, lubricants, ken ti regular a konsultasyon kasta met ti panag-inom ti Pre-Exposure Prophylaxis (PrEP) kadagiti agkasapulan iti daitoy.
Kabayatanna, nagpakdaar ti sekretaryo nga apaman saan a maagasan ti panagwaras ti HIV ditoy Pilipinas ket mabalinen a lumagpas daitoy ti 400K a kaso.
Maibasar ti datos manipud DOH, manipud bulan ti Enero agingga Marso iti daitoy a tawen ket nakailista dan ti 5,101 a kumpirmado a kaso ti HIV.
Ngimmato daitoy ti 50% manipud ti 3,409 a kaso a nailista ti kapada a panawen idi napalabas a tawen. Kayat na sawen ket agingga 57 a baro a kaso ti inaldaw a mailislista para ti pakabuklan a 148,831 a kaso ti HIV ti intero a Pilipinas.
Kabayatanna, paubing pay a paubing dagiti mataktakuatan nga agpospositibo iti sakit ken ti kaubingan a nagpositibo ket ti 12-anyos manipud Palawan.
Segun iti ahensiya, ti sexual contact ti kangrunaan a rason ti HIV ita a tawen 2025 babaen ti panagiyot ti dua a lallaki.
Sakbayna ket inwaragawag ti DOH a maideklaran kas National Public Health Emergency iti HIV kasaruno a nag-numero uno ti Pilipinas iti addaan ti kangatuan a bilang kadagiti inaldaw a baro a kaso ditoy Western Pacific Region.
