Ilunglungalong ni House Majority Leader Ferdinand Alexander “Sandro” Marcos ti Ilocos Norte iti dagus a pannakaikkat ti travel tax ken patienna a panawenen tapno ikkaten daytoy gapu ta agbalbalinen a padagsen kadagiti biahero a Pilipino ken ti panagbangon ti ekonomia.
Impila ni Marcos ti House Bill No. 7443 a mangikagkagumaan iti naan-anay a panangikkat iti travel tax a naipaulog babaen ti Presidential Decree No. 1183 ken ti Tourism Act of 2009.
Iti sidong ti singasing, ti pondo para kadagiti ahensia nga agdama nga agnumnumar iti travel tax, kas iti Tieza, Ched, ken NCCA, ket maipaay laeng babaen ti General Appropriations Act.
Segun kenni Majority Leader Marcos, ti travel tax a dumanon iti P2,700 para iti first class ken P1,620 para iti economy class ket maysa a kanayonan a gastos a manglapped iti panaggaraw dagiti Pilipino nga agbiahe para iti trabaho, pamilia, ken dadduma pay nga oportunidad.
Impaganetgetna a daytoy ket maysa a padagsen nangruna kadagiti pamilia a Pilipino ken nasaysayaat nga usaren ti gatad para kadagiti kangrunaan a kasapulan ken ti lokal nga ekonomia.
Dinakamat ni Marcos a kaaduan kadagiti pagilian iti ASEAN ket inikkatdan iti kapada a buis tapno mangtignay iti turismo ken panagtagilako, isu nga agbalbalin a dehado ti Pilipinas iti panangmantener daytoy.
Kenunanapay, saan a pribilehio iti panagbiahe para iti kaadduan a Pilipino no di ket paset iti panagbiag ken komunikasion iti pamilia, isu nga iti panangpababa ti gastos iti panagbiahe ket makatulong iti turismo ken dagiti mangnamnama nga industria.###
