BR LA UNION – Pabor ni House impeachment spokesperson Atty. Antonio Audie Bucoy iti waragawag ti business community a kasapolan a mapapartak ti impeachment trial ni Vice President Sara Duterte tapno agtalinaed a natibker ti ekonomiya ken kumpiyansa dagiti agpupuunan.
Kinuna ni Bucoy a mabalin a maapektaran iti investor confidence nu agpaut pay iti proseso ti impeachment.
Inlawlawag na a bayat a maitantantan iti panagusig, dumacdackel met iti pannakadismaya ti publiko a kayatna iti nalawag a sungbat ken kinapudno kadagiti alegasyo a sangsangwen ti bise-presidente.
Makaapektar pay iti dadduma a pagrebbengan dagiti mammanday linteg, partikular iti panagputar ken panagipasa kadagiti napapateg a gakat, iti maitantantan nga impeachment proceedings.
Kabayatanna, kinontra ni Bucoy iti waragawag ni Senate Pres. Francis Escudero nga awan ti limitasyon iti bileg ti impeachment court.
Immunan nga imbaga ni Escudero a ti impeachment court ket addaan ti nalawa a Constitutional authority tapno agdesisyon iti anyaman a mosyon.
Kas iti inaramid a desisyon nga i-remand wenno isubli idiay Kamara iti Articles of Impeachment kontra kenni Vice Pres. Sara Duterte.
Iti pannakisango ni Atty. Bucoy iti media, imbaga nga adda limitasyon iti konstitusyon agraman iti mismo nga impeachment rules, isunga saan a mabalin ti “bardagulan” iti nasao a kaso.
Inlawlawag na a saan a mabalin nga agmandar lattan ti uray anya, agsipudta biddut daytoy ken rumbeng a maiyannurot iti parameters ti Konstitusyon ti amin.
Inwaragawag na nga iti sumaganad nga aldaw ket ag-file iti prosecution panel iti maiyannatop a pleading a mabalin a maysa a mosyon wenno manifestation.
