Nainget ti panangilibak ti sumagmamano a kameng dagiti Young Guns ti Kamara ti adda pakainaiganda ti mapapati a pannakaipila manen ti 4th impeachment complaint kontra kenni VP Sara Duterte.
Agwarwaras gamin ti impormasyon nga adda manen mangipila ti maikapat nga impeachment complaint kontra iti bise presidente ken ipila daytoy ti sumagmamano a mammanday-linteg a kameng ti majority bloc.
Segun kenni Zambales Representative Jay Khonghun, awan ti aksyon iti biang ti Young Guns para iti sabali pay nga impeachment complaint; awan met ti impormasyon ni Lanao del Sur Representative Zia Alonto Adiong maipapan iti daytoy.
Awan kano ti ideyana gapu ta makumikom met daytoy kalpasan a pimmusay ina na.
Kinuna ni Tingog party-list Representative Jude Acidre, kasangsangpet na paylaeng ditoy Pilipinas ket awan met ti naawat na a damag mainaig iti pannakaipila manen ti reklamo.
Uray ni 1-Rider party-list Representative Rodge Gutierrez a kameng ti Young Guns a paset ti minorya ket awan met ti ammona maipapan iti maipagarup a fourth impeachment complaint.
Impasingkedna pay a dina pay nakita dagiti immun-una a tallo a reklamo a naipila kontra iti bise presidente.
Umunan nga inwaragawag ni House Secretary General Reginald Velasco nga adda mangipila iti impeachment complaint nga idauluan ti 10 agingga iti 12 a mammanday-linteg manipud iti majority ken minority.
