LA UNION – Nasentensiyaanen iti tungpal biag a pannakaibalud ti maysa a human trafficker a naaresto idiay syudad ti San Fernando, La Union.
Naammuan ti Bombo Radyo a base ti inruar a sentensya ni San Fernando City, La Union Regional Trial Court (RTC) Branch 30 Judge Alpino Florendo, napaneknekan a “guilty” ti akusado a ni Sheryl Lim ti Pagadian City iti kasona a qualified trafficking in person.
Malaksid iti tungpal biag a dusa a pannakaibalud, umabot met ti P4.2 million ti nasken a bayadan ni Lim gapu ti panaglabsing na iti linteg, karaman pay ti moral ken exemplary damages para kadagiti nagbalinna a biktima.
Immuna iti daytoy, inaresto iti kameng ti San Fernando City Police Office ni Lim gapu iti panangalana kadagiti babbai manipud idiay probinsya ti Zamboanga tapno pwersaen a pagtabahuen ken ilaklako kadagiti balay-pagraragsakan iti August 2017. (Absalom Flores)
