LA UNION – Arestado ti maysa a high value target (HVT) a kameng iti Sombrero drug group gapu iti sangsanguen daytoy a kaso iti pangukuman idiay Barangay Binloc, syudad ti Dagupan, Pangasinan.
Nabigbig ti akusado a ni Emmanuel Garabeles, residente ti Barangay San Julian East, ili ti Agoo, La Union.
Naammuan iti Bombo Radyo manipud ti La Union Police Provincial Office (LUPPO), maipagarup nga aglemlemmeng idiay Barangay Binloc ni Garabeles kalpasan a masampaan daytoy iti kaso nga addaan ti pakainaigan ti panaglabsing iti Comprehensive on Dangerous Drugs Act.
Kaddua iti kameng ti LUPPO a nangisirbi ti warrant of arrest kontra ti nasao a drug personality dagiti tauhan ti Pangasinan Police Provincial Office.
Umabot met iti P200,000 ti piyansa nga intuding ti korte para iti temporaryo a pannakaruk-at daytoy.
